Archive - August News

- Archive -

News
( August, 2009)

Speaker-in ICFAI hmun tlawh	Go to September News
August 31, '09 : Vawiin khan Assembly Speaker Pu R.Romawia chuan a bial chhung, Chaltlang-a Institute of Chartered and Financial Analyst of India (ICFAI) tlawhin, Administrative Building leh Institute Campus, Salem Veng, Chaltlang ami te chu a tlawh a. Hetiang eizawnna tluantling kawhhmuh thei zirna in te hi mipuiin engtiang takin nge kan hman tangkai theih ang tih chu thil pawimawh tak a ni, a ti. ICFAI hi October 2006 khan Mizoram ah branch hawn ve a ni a, tunah hian student 219 awm in BBA, BCA, BHTM leh MBA te azir thei a ni. Nikum 2008 khan Lunglei Rahsi Vengah ICFAI branch hi hawn a ni.
Lunglei HPC Vice Chairman-in Lunglei Civil Hospital tlawh	Top
August 28, '09 : Tukin zing khan Pu Joseph Lalhimpuia, Vice chairman High Power Committee chuan Civil Hospital a tlawh. Joseph Lalhimpuia chuan Chief Minister zahawm tak Pu Lal Thanhawla kaihhruaina hnuaiah Pu Lalrinlinna Sailo, Minister, Health & Family Welfare Dept. etc. hmalakna chak tak a zarah leh thawhhona tha tak avangin Lunglei khawpui chuan hmasawnna a hmu zel a, tunah pawh Civil Hospital Lunglei chuan hmasawnna a hmu mek zel a ni, a ti. Civil Hospital Lunglei chu kum 10 ralta vel atang khan hlamchhiah niin, bungrua leh hmanrua dangah te ngaihsak a hlawhlo hle a. Building sak a ni nachungin a sak hmangte a chhiat em avangin a far nasa hle a ni. Heng zawng zawng hi kan Chief Minister zahawm tak chuan Ni 18 May, 2009 khan a hmunah kalin thil awmdan dik tak a enin, thuam\hat ran ul a a hriat avangin, damlote mamawh hmasa heng bungrua te hi Civil Hospital-ah hian dah nghal a ni : Mattress - 70; Bed cover - 210; Draw sheet - 70; Pillow cover - 200; Blanket - 80; Mq. Net - 80; Bed Blanket -80; Patient suit - 80. Heng bakah hian damdawi engemawzat leh dressing material \hahnem tak te pawh dah thar a ni bawk.
Mizoramin KVI Award dawng	Top
August 28, '09 : Vawiin khan Pu Lalsawmzuala, Chief Executive Officer, Mizoram KVI Board, Aizawl chuan ‘National Award for Best KVI Board-2009’ chu Prime Minister Manmohan Singh hnen atangin Vigan Bhavan, New Delhi-ah a dawng a. He Award hi All India level-a KVI ti tha ber hnenah hlan thin a ni. Mizoram KVI Board chuan kum 2008 khan ‘All India Best Performance Award’ a lo dawng tawh bawk a ni.
P&S hmasawnna tur ngaihtuah	Top
August 26, 09 : Nimin khan PC Zoram S^ngliana, Minister, Printing & Stationery hovin a Office ah Consultative Committee on Printing & Stationery chu an thukhawm a. He deptt. hmasawnna tur chungchang an ngaihtuah. Meeting ah hian Consultative Committee Member Hmingdailova, MLA; Lalrobiaka, MLA; John Siamkunga, MLA; C.Ramhluna MLA leh Lalthansanga, MLA te bakah Printing & Stationery Department Secretary leh Officer te an tel a ni. Meeting ah hian hmarchhak bial tan Printing Institute Mizoram ah din te, Chawnpui a Printing & Stationery hmun ah staff quarter sak belh te, hmun khat atanga stationery item pek dan turte, Controller/Depot computer a inthlunzawm vek dan turte bakah MGI Machine lei dan turte sawiho a ni. Printing & Stationery Department hi June 26, 1980 khan I &PR department atangin a indanga, tunah hian Controller hnuaiah thawktu 250 an awm mek a ni.
MSHCS bill ngaihven ran tur	Top
August 26, 09 : Mizoram State Health Care Society chuan Health Care Scheme hnuaia bill thehlut tawh si, bill la hmulo zawng zawng, heng document Enrollment Form, chhungkaw hotu lu ber voter ID, Family Ration Card, mahni awmna damdawi in theuhah a rang thei ang bera thehlut tura hriattir an ni. Phai a refer a kalte chu Mizoram State Health Care Society Office, Dinthar-ah a chunga tarlan document te kengin a rang thei ang bera in report turin MSHCS chuan a ngen.
ACVCA meet-ah LAD Minister	Top
August 26, '09 : LAD Minister PC Lalthanliana chuan vawiin khan Aizawl City Village Council Association (ACVCA) Inthlanna, Vanapa Hall-ah a hmanpui. He inkhawmah hian Pu PC Lalthanliana, Minister of State, i/c. LAD, etc. chuan thu tlem swiin “Mizoram hian hruaitu rintlak, mipuite tana innghahna tlak a nei. Tuna kan Plan Budget pawh mi tam tak rin phak bakin zaa 25 laiin a sang ta te hi sawrkar laipui pawhin hruaitu tlinga Pu Lal Thanhawla, kan Chief Minister hi an pawmzia a lang em em a ni,” a ti. Tuna V/C lo kalkhawm te hi sawrkar leh mipui tan rintlak leh innghahna ngam in nih ngam in nih ngei ka beisei. Ram leh hna siamthatna kawngah khua leh veng tina hruaitute chu sum leh paia rinawm taka thawk a, mi duhsak bik nei lova mitin tan thlamuanna tham ni tura tan la theuh turin a chah bawk.
Parliamentary Secy. bill lak sawifiah	Top
August 26, '09 : Aizawl nitin chanchinbu Vanglaini volume-XXIV Dated 26th August 2009 Nilaini phek hmasa bera tarlan - Parliamentary Secretary pahnihte an zinna bill kal dan chiang lo? tih thupui hmanga Pu K.S.Thanga, Parliamentary Secretary bill lak chungchangah sorkar chuan hetiang hian thudik zawk a tarlang - Pu K.S.Thanga, Parliamentary Secretary nupui Pi Vanlalsawmi hi Cancer vei lai a nih bakah Cervical Spodylitis natna a neih bawk avangin Indian Spinal Cord Injury Centre (ICIC) New Delhi ah referred a ni a. Medical Board of Examination Registration No. 560 Dt. 2/3/2009 angin attendant pakhat a hruai phalsak a ni. Hemi ang hian March 5-20 chhung khan New Delhi-ah chuan zuk kalin sawrkar danin a phal ang thlapin Pu K.S.Thanga hming hian bill siama pek fel a ni.
Governor-in MKHC hruaitute a kawm	Top
August, 25, '09 : Mizoram Larsap Lt Gen (Rtd) M M Lakhera, PVSM,AVSM, VSM chuan vawiin chhun khan a chenna inah Mizoram Kohhran Hruaitu Committee hotute lenga sawmin thil pawimawh hrang hrang a sawipui. Governor chuan tun hnaia Kolkata khawpuia Indian Chamber of Commerce hotute a kawm thu sawichhuakin hmarchhak state leh a bikin Mizoram chu an lo la hriat chian loh thu an lo hrilh a. Sumdawnna hrang hrang leh sum veivir kawnga helai biala hmalak an chak thu leh amaherawhchu a ram mipuite rilru sukthlek hriat hmasak an duh thu te an lo hrilh a ni, a ti a. Amah pawhin Mizoram chu state ralmuang leh hetiang kawnga hmalak theihna hmun remchang tha tak a nih thu a hrilh fiah dante a sawi a. Hetianga state pawn lam miten Mizorama sumdawnna lian tham an rawn tih hi Mizote tan hlauh tur awma a hriat loh thu leh inchimral hlauhna thinlung awm thinte pawh hi belhchian dawl lo a nih zawk thute sawiin Mizoram mi leh sa tam tak phai ramah hnathawk leh lehkha zirin an kal chhuak tam hle a, an Mizo nihna an hlauh chuang lo, a ti. Rel kawng sial chungchangah pawh chimral hlauh aiin mahni lo inbuatsaiha, a hlawkna tel tura lo inzirtir zawk chu thil pawimawh a ni ang, a ti a. Heng thilah te hian kohhran hruaitute chu tanpuia sawmin an kohhran huang chhungah theihtawp chhuaha hnam humhalh leh hnamdang sumdawngte laka inventhiam pawimawhna te sawi zau turin a sawm a. Rilru zau tak pua hnamdangte nena boruak tha siam turin kohhran hrang hrang hruaitute chu a ngen a ni.
Champhai Dist. ah NLUP	Top
August 25, '09 : Vawiin chawhnu dar 1:00 khan Chaphai D.C. T.V.Fambawl office-ah NLUP hna tan dan tur Line Department ten an rel. NLUP atana hna hmasa ber survey hna chu tan nghal a ni ta a. Line Department te kaihhruaina a survey ti turin sawrkarin MUP le YMA te a ruat a. MUP te chuan YMA ten vaihma mai se an tih avangin YMA te tih tura ruat a ni ta a. Kum 2008-2009 chhunga sum lakluh dan te chhungkaw member zat leh khua a awm tan kum, chhungkua eizawnna aah te survey an nei anga, In tin survey tur a niin hetah hian N.P.Election hnuhnung ber a chhungkua angin an endik ang. Report te hi 20 September 2009 ah thehluh kim vek tura rel a ni bawk. Line Department ten an tlawh tur khua chu hetiang hian remruat a ni:- 1.Divisional Horticulture Officer, Khawzawl in khaw 16. 2.District Agriculture Officer, Champhai in khaw 12 3.District AH & Vety Officer, Champhai in khaw 13 4.DS & WCO Khawzawl in khaw 13 5.District Sericulture Officer, Champhai in khaw 7 6.Sub-Divisional Agriculture Officer, Khawzawl in khaw 15 7.Sub-Divisional Horticulture Officer, Champhai in khaw 12 8.Sub-Divisional Industries Officer, Champhai khaw 11 9.Fisheries Demonstrator, Champhai khaw 6.
Aizawl Municipality Act 2007 thlirho	Top
August 25, '09 : Vawiin khan UD&PA Minister Zodintluanga hovin Aizawl Municipality Act 2007 chu sorkar mi pawimawh ten an thlir ho. Meeting-ah hian he dan hman meka siamthat ngai laite, belh ngai leh ennawn ngai laite sawihovin Secretary UD&PA hovin Sub-Committee in uluk zawkin lo thlir se tiin an rel a. Sub-Commitee thurawn leh rawtna te chu hun remchang hmasa berah Minister ho hian thlir ho leh nise an ti.
Thailand leh Mizoram thawk dun dawn	Top
August 24, '09 : Kawng hrang hranga Thailand leh Mizoram thawh dun dan tur kawng dapa Mizoram-a lo kal, Dr. Chira Hongladarom, Secretary General, Foundation for International Human Resource Development(FIHRD)chuan vawiin tlai khan Chief Minister Pu Lal Thanhawla chu a office ah a hmu a. Mizoram State Planning Board hotute, Pu Lalkhama, Vice Chairman leh Pu P.L.Thanga Member & Secretary te nen chhun lama ram pahnihte thawhho theihna tur kawng an lo sawiho te chu Chief Minister hi a sawipui. Nimina Dr. Hongladarom leh Mizoram State Planning Board hotute thukhawm chuan Agriculture, Tourism, Human resource development, Energy, Industrial development, Infrastructure, Environment leh Social and Cultural exchange te chu Thailand leh Mizoram thawh dun na tura hmalakna atan an ruahman a. Heng thila Mizoram leh Thailand thawh dun dan tur hi FIHRD chuan a buaipui dawn a ni. Chief Minister nena an inkawmna ah Dr.Hongladarom chuan agriculture leh a kaihhnawih peng hrang hranga eizawnna ah te, Tourism leh Industry lamah te Thailand hlawhtlinna chu Mizoram tan a taka hman tangkai ve theih a nih dan sawiin hemi kawnga sul su turin FIHRD chu a inhuam tih a sawi a. Khawchhak ram dang China, Vietnam, Laos, Cambodia leh Myanmar ah te hma an lo lak tawh dan te tarlangin heng ram te hian hmasawnna kawngah an than chak pui hle tih a sawi a. Mizoram leilung, a sik leh sa, ramngaw hausakna leh thlai thar te enin FIHRD chuan hmalak nan duhawm a ti a, an tan chona phurawm tak a ni, a ti bawk a. Thawh dunna tur Action Plan duang turin Working Committee in rang takin hma lo la se a duh thu pawh Chief Minister hi a hrilh a ni. Dr. Hongladarom hian cultural exchange programme neih thuai pawh a rawt bakah English leh Mathematics zirtir turin Mizo te chu Thailand-in a mamawh ve thung dawn niin a sawi bawk. Chief Minister chuan FIHRD hotute leh State Planning Board hotuten Mizoram leh Thailand te thawh dunna tur ruangam an siam chu tha a ti a. Mizoram chu hun rei tak ram buai vanga hmasawnna kawnga a hnufum dan sawiin India ramin 5th Five Year Plan a hman khan Mizoram chuan a vawi khatna a hmang ve chauh a ni, a ti a. Thailand tih dan entawnin Mizoram chu dinhmun sang takah a invawrh thei ngei ang tih a beisei thu sawiin chumi ti puitling tura FIHRD te nen thawkho turin Mizoram sorkar chu a inhawng tih a sawi. Mizoram leh Thailand thawh dunna tura hmalakna bawhzui turin Dr. Hongladarom hi thla 6 hnu ah a lo kal leh dawn a ni.
Saiha-ah NLUP meeting neih a ni	Top
August 24, '09 : Vawiin chawhma dar 10 : 00 khan D.C. Committee Room, Saiha-ah N.L.U.P. Survey Operation neih dan tur chungchang ngaihtuahin District Bawrhsap Pu Rodney Lalrinawma hovin meeting neih a ni. He meeting hi Pu Zorammuana, Secretary, N.L.U.P Apex Body chuan a neihpui a. N.L.U.P. kalphung leh inthlunzawm dan tlangpui report tawi pe in Baseline Survey Report hi September, 2009 chhunga neih zawh hman ngei ngei a ngai a ni, a ti a, hemi atana inbuatsaihna pawh hmanhmawh taka kalpui a ngai a ni, a ti bawk. A kumkhatna a tan hian Rs 100 -120 crores hmuh beisei a ni a, hei hian chhuhgkaw 24,000 - 30,000 vel tuam thei tur a beisei a nih thu leh Constituency tinah chhungkaw 600 -700 vel pek theih beisei anih thu a sawi bawk. N.L.U.P. kaihhnawih Line Department pasarih heng Sericulture, Agriculture, Horticulture, Vety, Fisheries, Industry, leh D.R.D.A. te thlangchhuakin heng department te hian Family Survey Report Form hmangin Saiha District chhung khawtin-ah Survey hi an nei dawn a ni, an survey neihna tur bial hrang hrang leh Line Department te bial tur theuh pawh he meeting-ah hian siam fel nghal a ni a, Line Department te hian khaw hrang hranga tlawmngai pawl te chu phungbawmah sawmin Survey Report Form pein an ziah dan tur uluk takin an hrilhfiah anga, an Survey lak chu Line Department te hian an la khawm leh dawn a ni. Survey an neih zawh hian an report lakkhawm te hi D.C. hnenah September thla chhung ngeiin an submit leh vek tur a ni. D.C. te hian October chawlhkar hmasa berah N.L.U.P. Implementing Board hnenah an submit leh ang.
IITF-a tel dan tur rel	Top
August 24, '09 : Vawiin chawhnu dar 1 khan Industries etc. Minister Pu S. Hiato office chamber-ah ama hovin India International Trade Fair 2009 November ni 14 a Pragati Maidan, New Delhi a tan turah Mizoram tel ve dan tur rel a ni. Pu Hiato chuan he Fair pawimawh tak India ram state zawng zawngte bakah International Countries (Khawvel ram hrang hrang) amite tel thinna ah hian Mizoram sorkar-in kan hnam leh ramin kan thil siam chhuah leh thar chhuahte entirna hun remchang tak kan neih ve theihna anih bakah Mizoram Day emaw Mizoram Nite ah te kan hnam lam bakah zaithiam te kan pholanna tha tak anih thu a sawi. Vawiin thukhawm hian he hun pawimawh takah hian tel ve ngei nise tih relin, hmalak zel turah Industries Secretary, Pu Lalrinawma hovin, Pi B. Sairengpuii, Secretary, Tourism etc. leh Director of Industries Pu Shurbir Singh te nen, Industries, Information & Public Relations, Tourism, Horticulture leh helam pang kaihhnawih department dangte nen committee a din (siam) nghal bawk.
CM-in SBI New Sectt. Branch hawng	Top
August 24, '09 : Chief Minister Pu Lal Thanhawla chuan vawiin khan New Capital Complex, Khatla-ah State Bank of India ( SBI ) New Secretariat Branch thar, Mizoram-a SBI Branch puitling 23 na tur a hawng. Hmeichhe hlang thawktu awmna tur a ni a. He SBI Branch thar hi Sattelite Bank-te tiam chuan a 28 na tur a ni. Chief Minister chuan SBI hotu ten helai hmun pawimawh tak maiah branch thar an rawn dah chu lawmthu a sawi a. Mipuite chu bank dukdak lo leh phuahchawp bank te lakah fimkhur hle tura chahin, ‘chiahpuam’ tih hian mi tam tak a tibuai chu pawi a tih thu a sawi a. Bank dukdaklo kan lo bawr nasa lutuk thin hian sum ngaina hnam kan nihzia a tilang a, a vanduaithlak hle a ni a ti a. Loan kan pukte lah kan rulhna a chhe hle thin a, hei hian kan rinawmlo tih a kawk bawk a ni a ti a. Kan in siam that a, tan kan lak angai a ni a ti. Pu Hawla chuan, nationalised leh settled bank te chauh hmang tangkai a, rinawmna nen chhawr thin tura mipuite chahin, bank lam pawh mipui te mamawh hria a zau taka inhawng turin a ngen bawk a. Pu Lal Thanhawla chuan bank nen inthlunna hun rei tak alo neih tawh thu sawiin, kum 9 chhung zet bank hna a thawk tawh a ni a ti. A thawh chhung zawng hian an sawnna apiangah, hnathawh ala duh avangin, a kal zel thin thu a sawi a. A kal duh tawh loh hunah chuan a bang mai a ni tiin, tunlaiah sorkar hnathawk transfer chungchanga ‘mawngfual’ an awm thin chu a hriatthiam loh thu a sawi a. Transfer-na hmuna kal peih lo chu ban mai tur Chief Minister chuan a ti a, sorkar hna kan thawh tirha kan intiam ang ngeiin khawiah pawh lawmtaka thawk mai tur kan ni a ti. New Capital Complex a SBI branch thar hawn bakah hian Vaivakawnah branch thar dang, a 24 na tur hawn zui nghal a ni bawk a. New Capital Complexah vek hian a 7th na atan New Secretariat ATM Pu Vanhela Pachuau, Chief Secretary chuan a hawng nghal bawk a. Hetih rual hian vawiin vek khan ATM thar dang, Vaivakawn, Milleneum Centre leh Dawrpui ah te hawn thar a ni bawk . SBI thar hawn inkhawmah hian Chief Minister Pu Lal Thanhawla hi a nupui Pi Lal Riliani leh Home Minister Pu R. Lalzirliana ten an tawiawm a. Ministers dangte, Parliamentary Secretaries, MLA te bakah Khatla khawtlang hruaitu te an kal tha hle a ni.
Thailand Economic Advisor nen sawiho	Top
August 24, '09 : Thailand leh Mizoram te chuan hmasawnna kawng hrang hrang engemaw zatah thawhho theih dan tur an sawiho. He sawihona hi vawiin chhun khan I&PR Conference Hall-ah Thailand sorkara Economic Adviser Prof.(Dr) Chira Hongladarom leh Mizoram State Planning Board Vice-Chairman Pu Lalkhama IAS(Rtd) te bakah Mizoram sorkar department leh pawl hrang hrang aiawh mi pawimawh sawm bik ten an nei a. Agriculture, Human Resources, Tourism, Energy, Environment, Industries, Infrastructure leh Socio-cultural lamah te thawhho theih dan tur huam zau takin an rel a ni. Inkhawm kaihruaitu Mizoram Planning Board Vice-Chairman Pu Lalkhama chuan India sorkarin Look East Policy a neih mekah hian Mizoram chuan remchanna chhenfakawm tak a neih theih a beisei thu a tarlang a. Asia chhimchhak ram hrang hrang te nena insumdawn tawnna turah Mizoram chu remchang hle a a hriat thu sawiin kawng tinrenga hmasawnna turah a inpuahchah ngai a, chuvangin ram thenawm hmasawn tawh leh changkang zawkte thil tih dan zir a pawimawh hle a ni, a ti. Prof.(Dr) Chira Hongladarom Thailand sorkara Economic Adviser hi Secretary General, Foundation for International Human Resource Development a ni mek a. Thusawiin Thailand chu tun hma chuan ram hnufum leh indopui tuartu ram a nih avangin ram rethei tak a nih dan te, amaherawhchu hmasawnna kawng zawh tura sorkar policy mipuiin an tawiawm that avanga an dinchhuah tak dan a tarlang a. Tun dinhmunah chuan khawvel hriat tourism lamah te, buhbal thar leh sumpai dinhmunah te ram hmasawn a nih dan a tarlang a. Ram dangte hnena hetiang an hlawhtlinna thu hi zau zawka puanzar leh puih an tulna apianga puih an inhuam dante sawiin Mizoram sorkar nen pawh theihtawpa tanho a chak zia a sawi a. Mizoram chu state pakhat ve mai a nih avanga sorkar laipui kal tlanga thil tih ngai tam tak a awm nachungin amah leh a pawl te chu be pawpa englai pawha tanpui theih dan a awm thu a sawi a ni. Hmasawnna tura ruahmanna (plan) siam kawngah a tak ram thleng thei ngei tur (realistic) leh remchang (relevant) a pawimawh a tul fo thin Prof. Chira chuan a ti. Vawiin sawihona hunah hian department leh pawl hrang hrang aiawhte chuan zawhna tangkai tak tak te zawtin, Thailand rama hmasawnna kawng an zawh dan hrang hrangte an zawt hlawm a, sawihona boruak zalen leh inpawh tak an hmang a ni.
CM hovin ADA meeting	Top
August 24, 09 : Aizawl Development Authority (ADA) chuan vawiin khan a tum 7-na atan Chief Minister Office’s Conference Hallah Chief Minister Pu Lal Thanhawla, ADA Chairman ni bawk, kaihhruaina hnuaiah meeting an nei. Meetingah hian thurel tur chi hrang hrang 10 chhawpchhuah a ni a. Chung zingah chuan meeting hnuhnung bera thurel takte bawhzui anih dan te, ADA chungchanga status paper siamte, ADA in sum lama harsatna a neih te, ADA Building Regulations,2008 kenkawh chungchangte, ADA Buildin regulations,2008 siamthat te, Building Regulations hnuaia dan bawhchhiat enfel, Working committee chungchang te, JNNURM hnuaia schemes hrang hrangte hman dan tur te, Ch. Chhunga Bus Terminal, Thuampui ami Aizawl Municipal Council kuta hlan chungchang leh BPL te tana Building Plan leh Drawings te man chawi ngailova duan sakte an rel a ni. Committeah hian Committee memberte bakah Pu Zodintluanga, Minister for UD & PA etc, ADA membera ruat thar Pu Lal Thanzara, Parliament Secretary, Pu R.Lalrinawma, MLA, leh Lt.Col (Rtd) Z.S.Zuala,MLA te an tel a ni.
Cyber crime laka inven dan tur inzirtir	Top
August 21, '09 : Vawiin nilengin Central YMA leh Information and Communication Technology department huaihawtin Central YMA Hall, Tuikhuahtlang-ah 'Cybercrime leh Mizo society' tih thupui hmangin Cyber crime laka inven dan tur zirhona neih a ni. He hun hmanpuitu Home Minister R. Lalzirliana chuan tunlai hmasawnna thang mekah Mizoram pawhin Cyber crime laka invenna turin CID (Crime) hnuaiah Cyber Crime investigation cell din turin hmalak mek a ni a, Central-ah proposal thehluh tawh a ni, a ti. Cyber crime hian khawvel office pawimawh tak tak a lo tibuai tawh tih sawiin, India ram ngei pawh tum 3 lai a tihbuai tawh thu a sawi a. Mizoramah chuan kan buai phah ni lovin tun dinhmunah intihmualpho nan kan hmang tam zawk a, hei hi itsikna vang a nia a lan thu a sawi. Sualna hrang hrang do kawngah Police mai ni lovin sorkar mite bakah mipuite nen sualna pung zelah kan tanrual a ngai ni, a ti bawk. He seminar-ah Cyber crime, cyber terrorist, cyber pornography, cyber stalking leh virus hmanga mi computer tihchhiat bakah tunlai electronic hmanga suahsualna chi hrang hrang leh fimkhur a tulna te mithiam ten zirtirna an pe a, chawhma lamah CYMA president JH Zoremthanga'n kaihruaiin chawhnu lamah Dy. Director I&CT deptt. in kaihruai thung.
Land Custom Station sawiho	Top
August 21, '09 : Vawiin chawhnu dar 1:00 khan Parliamentary Secretary S.Laldingliana hovin a office-ah Mizoram leh Myanmar ramri, Zokhawthar a Land Custom Station changchang mawhphurtu sawrkar department mi pawimawhte nen an sawiho. Zokhawthar a Land Custom Station hi office leh tul angte kum 2007-ah khan an sa zo tawh a; amaherawh chu tun thlengin hman a la ni lova. Hei hi thawmthat ngaite thuam tha in hman theih tura buatsaih nise, kumin December thla laihawl vel a hawn hman tura siam nise an ti a ni.
Transport Minister leh NFR hotute Rel kawng chungchangah inkawm	Top
August 21, '09 : Vawiin khan Transport Minister Pu P.C. Zoram Sangliana chuan ama pisaah Northeast Frontier Railway hotute a kawm a, Mizoram-a rel kawng sialna tur hmabak hrang hrang a sawipui a ni. Minister chuan Bairabi atanga Sairang thlenga rel kawng siam chu sorkarin a project ngaih pawimawh berte zing ami a ni tih sawiin, NFR ten hna duh aiin an kalpui muang a tih thu a sawi a, a hun takah zo fel turin a ngen. He rel kawng sialna tura Mizoram sorkar thawh ve tur awm ang angah state sorkar chuan theihtawpa tan lakpui leh thlawp a tum thu a hrilh bawk. Minister chuan rel kawng siamna hna chi hrang hrang remchang a awm theihna apiangah ram leilung fa Mizo thalaite chhawr turin a chah bawk. NFR Chief Engineer Pu V.P.Srivastava chuan rel kawng an siamna tur atan estimate engemawzat chu an siam fel tawh thu Minister a hrilh a, sanction a awm veleh hna tan thei tura an inbeisei thu a hrilh a. Survery hna chu kalpui mek a nih thu sawilangin Pu Srivastava chuan tum ang ngeiin Feb/March 2010 chhungin hna an thawh zawh theih nan theihtawp an chhuah ngei tur thu a hrilh bawk. Meeting-ah hian Mizoram sorkar aiawhin Transport Secretary Pu K.Lalnghinglova, State Level Task Force for National Railway Project Chairman Pu Zasanga IPS(Rtd), Transport Director Pu Siamliana leh officials dangten Minister an tawiawm a. Northeast Frontier Railway atangin Chief Engineer bakah Dy. Chief Engineer Pu M.B.Dekate, Executive Engineer Pu Subir Roy leh Engineer Pu M. Talukdar te an tel a ni.
Champhai-ah NLUP hmalakna tur sawiho	Top
August 21, '09 : Vawiin chawhma dar 10:30 khan Champhai I & PR Conference Hall-ah Champhai District D.C. Pu T.V.Fambawl kaihhruaina in NLUP chungchang sawiho a ni a. NLUP kaihhnawih tur Department hrang hrang Officer-te bakah NGO lam hruaitute pawh an tel. Aizawl atangin Dr. Saithantluanga, Project Director, NLUP in sawi hawnna leh hrilhfiahna hun a hmang a ni. Champhai District D.C. Pu T.V.Fambawl in NLUP chungchang sawi hawnna a neih hnuin Dr. Saithantluanga chuan NLUP chungchanga hnathawh tan dan tur a sawi nghal a. NLUP (Implementation Procedure Scheme) chu Champhai ah vawiinah tih tan a ni ta in hmalak pawh tan nghal tur a ni, a ti a. Hna hmasa berah chuan In (house) tinah lut chhuak vekin Survey hna an ti hmasa ber dawn a ni. Survey ti tur hian NGO te ruat an ni ang a. Department ruat bik ten an kaihruai ang. Chhungkaw tin hian MP thlan hnuhnung bera Voter Identity Card anga kalpui tur a ni. Chhungkau in eizawnna tur atana an thlan (Trade/activities) chi hrang hrang NLUP hnuaiah hian ruahman a ni a. Amaherawhchu a ram leh a hmun a zira trade tha thei ang tur Department mithiam ten an ngaih chauh thlan tir tur an ni. Marketing Cell mumal taka ruahman a nih tawh avangin heng ho hralhna tur hi an niin an lo ruahman vat vat dawn a ni. Composite Scheme a siam an nih avangin Mizo hnam nunphung (Traditional Method) milin trade tenau (Subsidiary Trade) ah pawh ar, vawk, etc. an vulh tura ruahman a ni tlangpui vek a ni. Trade thlan theih te chu heng department hrang hrang hnuai atang hian siam a ni a. 1) Horticulture Department; 2) Fisheries Department; 3) Sericulture Department; 4) Animal Husbandry & Vety Department; 5) Soil and Water Conservation; 6) Agriculture Department; 7) Industries Department. A ram leh a bial dinhmun enin heng trade bak a dang pawh hi siam belh zel theih a ni ang. Trade thlang tu tur ram nei lo te pawh ram pek an ni ang a, hei hi a Dan zam fel vek tawh a ni a. Thawk tha duh lo te chu ram chhuhsak leh theihna dan pawh siam nghal a ni. Champhai ah hian V/C awp khaw 100 an awm a, hetah hian chhungkua 23,000 chuang vel awm anga chhut a ni a. Hna hmasa ber tur Survey hna hi September 2009 thla chhung hian tih zawh hman tura duan a ni. NLUP chungchanga ruat bik Department Line Department te hian Survey hi an enpui reng dawn a ni. District Level-a D.C. te mawhphurhna tur pawh a Guideline ruahman mek a ni. Family khat survey na atan NGO te hi Rs. 2/- zel pek an ni ang. Capital Letter in survey form te hi fill-up tur a ni. Khawtina In zawng zawng survey tur a ni. District Officer ten an area chhunga survey forms NGO tena an fill up chu an la khawm leh vek ang a, September kar tawpah D.C. hnenah an submit vek ang. D.C. ten October kar tir berah NLUP Implementing Board ah an thehlut ang.
NE Traditional Costume Show and Exhibition	Top
August 19, '09 : Nihnih awh tur hmarchhak state-a hnam hrang hrang inchei dan pholan leh zawrhchhuah chu vawiin chhun khan Aizawl Vanapa Hall-ah Art & Culture Minister Pu P.C. Zoram Sanglianan a hawng. North East Zone Cultural Centre Dimapur leh Mizoram sorkar Art & Culture Department tangkawp he show leh exhibition-ah hian hmarchhak state hnam hrang hrang Nagaland,Arunachal Pradesh,Tripura leh Mizoram ten pipu chen atanga an hnam inchei dan an entir a. Hralh theih turin an phochhuak bawk.
Buh chin dan thar enchhinna hmun tlawh	Top
August 19, '09 : Vawiin khan Dihmunzawl-a Pi Kaphliri leilet leh Pu Lalthankima Phillips (Arcadia) leileta Agriculture Department in SRI hmanga Buh an chinpuina hmun chu Pu H.Liansailova, Minister, Agriculture leh Pu KS Thanga, Parliamentary Secretary, Agriculture ten a hmunah an tlawh a, Pu P.Bhattarcharjee, Director, Agri (Crop Husbandry) leh Agri. Officers ten an tawiawm. Buh zaikhat a phunah peng 70-80 te a awm thei a. Tui mamawh tam lova buh peng 70-80 vel te a awm thei tih hmuh a nih hian Minister Pu H.Liansailova chuan, Mizoram Leiletah tui lak tur kan neih that vak loh avangin he Buh chin dan thar hi Mizoram leilet buh chin hlawk zawk a thar theihna niin a lang a, Mizoram hi ruah vantla ring a thlawhhma siam kan nih avangin uar zawk a he SRI hi kalpui a duh thu a sawi. System of Rice Intensification (SRI) hi kum 1980 tir lam khan Puithiam pakhat Father Henry De Launie chuan Madagascar ramah a lo bei tawh a. Nikum 2008 atang khan chin chhinna Mizoramah kan lo nei ve tan tawh a. Pu Pianmawia, Samlukhai leilet Changte ramah Agri. Deptt chuan nikum 2008 a lo enchhin (Demonstrate) a report na ah kum dang a phur thum a thar thinna ah phur sawm a let thum aia tam a thar tih report dawn a ni. SRI chu engnge ni : Buh chin dan thar nursery atanga Buh tiak naupang te ni 8-15 a upa phun ngei tur a ni a. A mal zaikhat a phun a, a bi inkar hlat zawng chu 30cm (1 foot) emaw, 25cm (10 inches) emaw a phun tur a ni. Buh tiak phun tur chu lak atanga minute 30 chhunga phun ngei ngei tur a ni. Buh chinna hmun hi a hnawng tur a ni a, tui chim tir reng tur a ni lo. Hetianga buh kan chin chuan buh chi 5Kgs/Ha (Tin 2 1/2 hmun) a tawk. (Kg 40-50/Ha tin 2 1/2 hmunah buh chi hman dan tlangpui a ni thin.) He buh chin dan thar (SRI) hi Mizoram hmun hrang hrangah Agri. Deptt. (Crop Husbandry) chuan loneitu te nen tangrualin enchhinna a kalpui mek a ni.
MST Bus tlan dan tidanglam	Top
August 19, '09 : MST Bus indaih lohna avangin Passengers neih mumal loh deuhna lam, a hnuaia tarlan ang hian MST Bus tlan dan tihdanglam a ni: 1. Lunglei : Aizawl atanga Service tihtawp rih a ni a. Lunglei atanga rawn Service erawh a la awm ang. 2. Vaitin : Kar khatah vawi-2 Thawhlehni leh Inrinni-ah Aizawl atangin a chhuak ang. 3. Kanhmun : Ningani a kal tihtawp a ni ang a. Thawhlehni leh Inrinni-ah chauh a kal tawh ang. 4. Saiha (Night) : Kar khatah vawi-1, Nilaini ah chauh a kal tawh ang.
KVK Scientific Staff meeting neih a ni	Top
August 19, '09 : A tum khatna atan Krishi Vigyan Kendra (KVK) hnuaia Scientific Staff te chuan vawiin khan Agriculture Conference Hall-ah inkhawm pawimawh tak an hmang a. He ni 2 awh tur meeting hi Agriculture Minister Pu H. Liansailova’n a hawng a ni. NLUP Apex Board Vice-Chairman Pu R. Selthuama pawhin Meeting hawnna inkhawm hi a hmanpui a ni. KVK Meeting chawhma hunah hian Mizorama KVK Centre 8 - Kolasib, Hnahthial, Lengpui, Khawzawl, Lawngtlai, N. Vanlaiphai, Saiha leh Selesih-a Programme Coordinator ten an hmalak dan a lem nen chipchiar takin an entir a. Hrilhfiah ngai lai leh sawibelh tur an tarlante chu Minister hian uluk takin a ngaihthlak sak a ni. Pu H. Liansailova chuan an thil entir leh tarlante chuan a rilru a khawih tak zet thu leh Zoram loneitute hmakhaw thlira KVK-in hma a lak dan a hriat te chu fakawm a tih thu a sawi a. Lo neih leh kuthnathawktute hmasawnna tur chuan research-a innghah chu thil tul hmasa ber a nih thu a tarlang. KVK chuan science leh technology hmanga agriculture leh a kaihnawih hmasawnna tur a thawh hlawk hle a ni, a ti. KVK Centre te chu hun remchangah tlawh kim vek a tum tur thu Agriculture Minister chuan a sawi bawk. NLUP chungchang sawiin Minister chuan he policy tum ber chu loneitu leh kuthnathawktu ten intodelha eizawnna ngelnghet neih tir leh a huamzau thei ang bera kalpui a ni a. Chumi ti hlawhtling tur chuan science leh technology thiamna hmanga KVK hmalak leh thurawn te chu ngaihpawimawh an ni ang, a ti. Kum 30 aia tam kal ta atang khan Mizoram chuan ei leh barah kham khawp kan thar pha tawh lova, amaherawhchu tuna kan state chhunga leilet siamna hmun remchang zawng zawngte hi beihpui thlaka kan sawngbawl chuan kan mamawh buh leh thlai 50% chu kan thar thei ang tih a chiang a. Hei hi chonaah hmang se a duh thu a sawi a. Sorkar laipui ruahmannaa Kolodyne Project kum 6 chhunga puitlin mai tur pawh hi remchanga laa loneitu leh kuthnathawktu ten hmang tangkai ngei se, chona lian takah hmang se, a ti bawk. Krishi Vigyan Kendra, KVK tia hriat lar zawk hi loneiha eizawngte tana eizawnna ngelnghet tak an neih theihna tura science hmanga training pek leh zirtir chu an hna pui ber a ni a. KVK te hi Indian Council of Agricultural Research (ICAR), Government of India ta an ni a, a enkawlna sum leh pai leh a hmalakna zawng zawng hi ICAR ruahmanna hnuai a mi vek a ni. Mizoram sorkar leh ICAR inkara MoU fel tak ziah a nih hnuin Mizoramah pawh KVK Centre 8 lai din a ni tawh a, chung zinga pakhat chu Central University, Selesih enkawlna hnuaiah a awm thung a ni.
SLQ Review Meeting on RCH&NRHM	Top
August 19, 09 : Vawiin khan Health Directorate Conference Hall-ah RCH leh NRHM hnuaia hnathawh dan State Level Quarterly Review Meeting neih a ni. Review Meeting hi Dr.Vanlalhruaii, Dy.Director (RCH) chuan a kaihhruai a, District tin atangin CMO leh MO te an kal kim hle. He hun hmanpuitu Dr.N.Pallai, Director of Health Services chuan RCH leh NRHM kalpui mek dan chu tha thawkhat hle mahse siamthat ngai lai tamtak awm nia a hriat thu tarlangin, CMO leh MO te chuan an hnuaia hnathawktute chu an hna theuh thiamtak leh phur taka an thawhtheihna tura enkawl leh fuih thiam a tul zia thu sawiin, CMO te pawhin an bial theuh taima taka fang thin tur leh damdawiin te chu zahawm leh fai taka enkawl a, damdawi hman tangkai loh tur kawl teuh teuh thin te chu ching lo turin a chah bawk ani.Dr.N.Pallai chuan CMO te hnenah chuan mahni bial mipui mi mawl ber tan pawha hraitthiam leh zawm thiam theihna tura zirtirna kalpui tur leh mahni khua theuha chanchinbu awm te chu hriselna lam atana hmang tangkai theuh turin a fuih bawk a ni. Hemi hnu hian Dr.Lalkailiani, Jt.Director (M) chuan Malaria lama hmalak zel dan tur leh hriattir pawimawhte tarlangin, Malaria tamna bialah chuan in tinah thosilen pahnih theuh sem anih thu te, chungte chu endik anih tur thu leh tunah hian thosilen 1,40,000 (Nuaikhat leh singli) zet lei leh tura ruahmanna kalpui mek anih thu a tarlang bawk a ni. Hemi hnu hian NRHM leh IMEP chungchanga intuaitharlehna hun an hmang zui nghal a, kalkhawmten an hlawkpui hle.
Khawkheng vanga harsatna thleng sawiho	Top
August 18, '09 : Kumin khawkhengin Mizoram hmun hrang hranga buh leh thlai chunga nghawng a neih dan chungchang chu vawiin khan Agriculture Minister Pu H. Liansailova hovin ama pisa ah Parliamentary Secretary Pu K.S.Thanga, Principal Secretary Pi L.Tochhawng, Agriculture Director Pu P. Bhattacharjee bakah Agriculture leh Horticulture department officers te nen an sawiho. Agriculture Department report hrang hrangte zirchian a nih hnuah Minister chuan kumin January-July 2009 chhungin khawkheng chuan Mizoram ram pum 59% a nghawng thu a sawi a, amaherawhchu August thlaa ruah a sur tam leh ta deuh chuan hei hi 48% ah a ti tla leh thei ta a ni tih a tarlang a. Agriculture Department officers leh field staff te chuan a hmunah ngei an enfiah a, district zawng zawng atanga report dawn atang pawhin khawkheng chuan loneitute a ti buai hle a ni tih hriat a ni. Hmun thenkhatah chuan buh pawh an chin tlai phah thu sawiin Minister chuan kumin chhunga buh thar chhuah chu kumdang nena tehkhin chuan 30%-50% in a tlakhniam a rinawm thu a tarlang bawk. Agriculture department chuan loneitute hnenah subsidised rate-in power tiller hralh tura hma a la mek chu tih hlawhtlin ngei a nih tur thu Minister chuan a sawi a. Hetianga power tiller diltute chuan a hmanna tur dik takah an khawl dawnte an hmang ngei a nih tih finfiah nan sorkar chuan affidavit a sign tir theuh dawn a ni. Agriculture Department atanga subsidised rate-a power tiller dil duhte tan tunkar chhung hi hun hawn belh leh a ni nghe nghe. Vawiin meeting-a Horticulture department aiawh telte chuan khawkhengin thei leh pangpar lam chu a khawih chhiat vak loh thu an sawilang bawk. Union Agriculture Minister Pu Sharad Pawar-in India state zawng zawnga Agriculture Minister-te hnena lehkha a thawn angin, kumin khawkheng chuan India rampumah loneitute chu harsatna namenlo a siam sak avangin August ni 21, 2009 (Zirtawpni) khian New Delhi-ah meeting a ko a. Hetah hian loneitute harsatna sutkian nan sorkar laipui atanga tanpuina an dawn theih dan tur kawng hrang hrang sawiho a ni dawn a. Agriculture Minister hova meeting chuan he meeting lo awm turah hian Mizoram dinhmun dik tak leh tanpuina kan mamawh ang chu tarlan ngei nise an ti a. Hemi atana lo inpuahchah turin Agriculture Department hotute chu Minister hian a hrilh a ni.
Subsidy sem inkhawmah CM	Top
August 18, '09 : All Mizoram Farmers Union (AMFU) buatsaih, ‘ Disbursement of Subsidy under Spices Board of India for the Cultivators of Ginger, Lakkadong Turmeric, Large Cardamom for 2009 ’ vawiina I & PR Auditorium a neih chu Chief Minister Pu Lal Thanhawla chuan a hmanpui. Spice Board of India kaltlanga subsidy an sem hi sawhthing, aieng leh elaichi chingtu chhungkaw 607 te hnenah pek an ni a. Kumtin chhung tin hnenah hectare 1 a chingtute hnenah Rs.12,500/- anga pek an ni a. Amaherawhchu huan an neih zauh zawng a inan loh avangin .4 hectare anga chhutsaka pek an ni. Huan hi kum 5 chhung an kalpui chuan organic tawh tura ngaih a ni bawk. Vawiina subsidy an sem zawng zawng hi Rs.26,57,560 /- a ni a. Chung zinga sawhthing chingtute hi khaw 7 atangin chhungkua 320 an ni a, aieng hi khaw 18 atangin chhungkua 192 leh elaichi hi khaw 3 atangin chhungkua 95 te an ni.
Sept. 7-ah Teachers' Day	Top
August 18, '09 : Kumin Teachers’ Day September ni 5 chu Inrinni a nih avangin Minister, Education Chairman-na State Level Committee lo rel angin, Sept. ni 7 (Monday) ah hman a ni ang. He ni pawimawh takah hian zirtirtu natna khirh bik tuarte tanpui nan Token Flag leh Car Flag te zawrh a ni thin a, heng atanga sum hmuh te hmang hian zirtirtu engngemaw zat tanpui an ni thin.
Lunglei High Power Committee thukhawm	Top
August 17, '09 : Vawiin chhun dar 12:00 khan HPC Meeting chu High Power Committee Office, Lunglei-ah Vice-Chairman Pu Joseph Lalhimpuia hovin neih a ni. He meeting-ah hian Pu Zodintluanga, Minister, I & PR etc. leh Pu Nihar Kanti Chakma, MOS i/c AH & Vety, etc. pawh an tel. Meeting-ah hian thu pawimawh tak tak, Lunglei khawpui leh District chhung hmasawnna, a hnuaia tarlante hi an sawiho - 1. Luangmual hmunah Inter State Terminal Bus stand dah tura hmalak nise tih a ni. 2. Tuna MST Bus stand hmunah hian Convention Centre sak a, MST department Bus parking place, Conference Hall leh a theih ang ang chhawng engemaw zat a sak a daihzai zawka hman nise tih rel a ni. 3. Tuna Mizoram Polytechnic, Lunglei hi tih len a Mizoram Engineering College dah nise a ti bawk. 4. Lunglei ah Shopping Centre dah ngei nise, a hmun tur pawh HPC in ngaihtuah nise tih a ni. 5. District Social Welfare office hmun tur pawh HPC Committee in zawn sak nise an ti bawk. 6. Tlabung Border Trade pawh sawrkar in ti puitling thuai tura hmalak nise tih a ni.
Health Care Scheme bill tang ngaihtuah	Top
August 18, '09 : Health Directorate Conference Hall, Dinthar ah Health Minister hovin, Reliance Company a bill tang tam tak release a nih thuai theih dan tur sawihona neih a ni a, he hunah hian Reliance Company lam hotu te mai bakah Govt & Private Hospital hotute an tel kim hle a ni. Health Minister Pu Lalrinliana Sailo chuan MoU ang ngeia kal anih tur thu leh mi harsa tak tak te bill hetiang a rei hrek sak anni chu pawi a tih thu sawiin a rang thei ang ber a harsatna kan neih te hi chingfel vat turin Reliance Company lam hotute hi a hrilh. Govt. leh Private Hospital hrang hranga hotute'n Reliance Company lamin harsatna an siamte an sawichhuak a, bill tang te chu pechhuak thuai turin an beisei thu an sawi. Dr.Biakthansangi, Dy.Chief Executive Officer, MHCS chuan Reliance Company lam hotute'n diklo taka thuthlung an palzut avanga hetianga buaina hi tawk ta annih thu sawiin, company lam hotute chu anmahni lam inenlet a, harsatna tawh tam takte hriatthiampui ve tura a duh thu a sawi bawk. Tun dinhmunah chuan Reliance Company te hian cheng Vaibelchhe 15 bill an pechhuak tawh a, Bill pending la awm zawng zawng hi cheng vaibelchhe 6 vel zet a la awm a. Health Minister hmalaknain he bill pending pawh hi pekchhuah thuai beisei a nih thu meeting-ah hian sawichhuah a ni.
MLTP Act kengkawh zel	Top
August 17, '09 : July, 2009 chhung khan Excise leh Police department chuan zu leh a kaihhnawih thil a mihring leh thildang an man zat hetiang hi a ni : Zu zuar - 235; Zu rui - 9; Rak zu - 3509.380 Lits.; Zu bilhlai - 13095 Tins.; Dawidim - 15.550 Kgs.; IMFL(750 ml) - 2953 Bots., 375 ml - 19 Bots., 180 ml - 428 Bots., Beer (650 ml) - 6 Bots., Foreign (Imp) Beer - 1 Cans; Zu sakna bel - 374 Nos.; Motor - 13 Nos.
Motor neitute hnena ngenna	Top
August 17, '09 : Aizawl khawpuia Lirthei nitina lo pung zel control hautak tawh tak bakah nitin deuh thaw a motor bo report leh zawnpui hna hi traffic police te hna ti hautak zualtu a lo ni mek zel. Hemi chungchangah hian Aizawl Traffic SP chuan hetiang hian ngenna a siam - Motor bo report zawng zawng hi motor dahna hmun (garrage) a mi nilovin kawngpuia dah deuh vek a niin misualte tan awlsam taka ruk theih an ni a. Aizawl khawpui chhung VCP leh Branch YMA President zawng zawng hnena ngenna siam, motor neitu zawng zawngte chu dan in a phut anga garrage-a motor dah vek tura ngenna chu hei hian a la hlawhting lo tih entir a, Dan zawm hi khua leh tuithate tih tur (duty) a niin dan zawm loh avanga harsatna a lo thlen hian chumi avanga a tuartu te chuan mawhphurhna an nei ve tho tih hriat a pawimawh hle a ni. Motor neitu zawng zawngte chu The Mizoram (Regulation & Control of Vehicle Parking) Rules 2000 in a phut angin leh an Motor te chu a lo him zawk theih nan motor dahna garrage ah motor dah theuh turin Superintendent of Police Traffic chuan a ngenin a hriattir a ni.
Independence Day ropui takin hmang	Top
August 15, 09 : India Zalenna kum 63-na chu vawiin khan Mizoram khawpui hrang hranga hman a ni a. Chief Minister, Minister, Parliamentary Secretary leh MLA ten he hun hi an hmanpui. Aizawl, Mizoram khawpui berah chuan Pu Lalthanhawla, Chief Minister-in a hmanpui a. Chief Minister chuan thuchah sawiin, India zalenna hi British awpbehna atangin tharum tel lo, dikna hmanga sualchhuah a ni a, hei vang hian kan zalenna hmuh hi a ropui a, ram dang mite pawhin min ngaihsan phahin min zah phah a ni a ti a. Zalenna kan hmuh theih nana nunna hlu tak hlan tute, tawrhna nasa tak tuartu te leh mi tam tak inpekna te hre rengin, an chungah chawimawina a hlan a. A bik takin, Hnam Pa Mahatma Gandhi, Pandit Jawarharlal Nehru, Sardar Patel, Netaji Subhas Chandra Bose, Maulana Abdul Kalam Ajad leh midangte kan hre reng a ni a ti. Pu Hawla chuan zalenna kan neih atang khan India chuan namenlovin hma a sawn a. Sum leh pai bakah, ramdangte nena kan sum veivir pawh nasa taka thangin, tunhnai maia khawvela sum leh pai dinhmun tlakniam, global recession khan min nghawng velo a, than lam kan pan zel a ni a ti a. Dr. Manmohan Singh kaihhruainain science and information technology lamah leh civil nuclear energy lama kan hmasawnna pawh khawvel hriat a tling ta a. Kum 60 kal ta chhunga ramin hmasawnna a neih te ram chhung kil tin dapa hmuh tur awm ta te hi India khua leh tui zawng zawng te tan chuan chhuanpui tlak a tling a ni a ti. Chief Minister chuan a sorkar chu kum chanve awrh chauh ala nih thu sawiin, siam that hna thawk chung zela kal an nih avangin chak taka kalpui a harsat thu a sawi a. Sorkar chu tha taka a kal chhoh theih nan Ministerte pui turin Parlimentary Secretary te amah ngeiin rinawmna thu tiam tira a lakluh thu a sawi a. An hun hmasa a an sulhnu hlamchhiaha awm mekte chu tuai thar an ni ang a ti a. Kuthnathawktute leh mi chanhai, pachhiate chu sorkarin a ngaihpawimawh ber tur thu sawiin, central sorkar pawhin an ngaipawimawh a ni a ti a. A chhanchhuah hna thawk turin NLUP chu Zoram dung leh vangah hman a ni ang a ti. Khawpuia mirethei tam tak awmte pawh ngaihthah an ni lovang a ti bawk a ni. Pu Hawla chuan thenawm ramte nena insumdawn tawnna a awm theih nan Trade & Investment Conclave neih tak bawhzuiin, Bangladesh nen MOU sign nghal a nih thu a sawilang a. Kan state pawna kan lakhuihthei te thawnchhuah a nih theih nan hmalak mek a nih thu a sawi a. Hei hi kuthnathawktute hamthatna tur niin, kum 2 chhunga puitlin theih tura beisei a ni a ti. Kan ramah kuttling lova sum lakluh tumna tihbo anih theih nan leh kan ram leh hnam tlukchhiatna bul, eirukna nuaibo a nih theih nan Anti Corruption Bureau chu tilianin, IGP ho tura hmalak mek a nih thu a tarlang a. Lok Sabha Inthlanpui 2009 leh South Tuipui Bye Election te fel fai tak, zalen leh ralmuang tak zawh fel a ni chu mitin hnenah Chief Minister chuan lawmthu a sawi a. Dan leh hrai tha zawk kan neih theih nan Law Commission pawh din fel a nih tawh thu a sawi bawk a. Zirlaite hmakhua ngaia, khawvel thang zel mila an zir chhoh ve zel theih nan a siam that hna thawk turin Education Reforms Commission pawhin chak tak hna a thawh chhoh mek thu a sawi bawk a. Vawiin Independence Day lawmna a zirlai thahnem tak an kal avangin Chief Minister chuan an chungah lawmthu abikin a sawi nghe nghe a. He ni pawimawh takah hian sorkar hotute an kal that viau laiin sawrkar hnatawktu dang te pawhin neitu chan changa ngaihpawimawh viau awm tak, kal an tlem em avangin Chief Minister chuan ‘indiscipline’ inthununna awmlo a ni a ti. Chief Minister chuan Mizote hi zuk leh hmuam ti nasa leh ei leh in duhtui tawklo kan nih avangin kan hriselnain a tawrh nasat thu a sawi a. Thingtlang lam mi ten hriselna tha zawk an neih theih nan National Rural Health Mission hnuaiah nasa zawka hmalak tur a nih thu sawiin, kan hospitalte pawh thuam tha in, hospital danga refer leh chhawn ngai tawh lo turin thihna tlak damdawiin ah siam vek tum a ni a ti. Kolkata airport bula TATA hospital sakna tur bulah Mizoram House sak tum a nih thu Chief Minister hian a sawi bawk a ni. Rel kawng chungchang sawilangin, Chief Minister chuan Sairang thleng rel kawng siam tum anih thu a sawi a. Mizoram chhim lama Koladyne Multi Nodal Transport Project hmalak tan mek chu Myanmar Sittwe port atanga Lawngtlai thleng motor lian tlan theihna tur kawngpui siam chu Mizoram PWD kutah Central sorkarin dahin a thawhna tur cheng vaibelchhe 680 pawh a rawn sanction tawh a ni a ti a, tunah hna thawh tan mek anih thu a sawi a. Zawh fel anih hunah chuan helai thleng hi rel kawngin a pawh a ngaih tur thu a sawi bawk. Chief Minister chuan rel kawng siam vanga mi tumah chimrala an awm ala hriat ngailoh thu sawiin, chimral hlauhawmna chu kan khua leh tui nilo, nitin mi nuai hnih dawn vel kan ram chhunga inhlawhfa reng, kan sum vaibelchhe tel min hui sak tute hi an ni zawk a. Anni hi kan hupbeha, an thawh ang thawk peih a taimak kan chhuah a ngai a ni a ti. Chuvangin chimral kan hlau anih chuan kan taima tur a ni Chief Minister chuan a ti.
CM hovin video conference	Top
Aizawl 14, 09 : Information & Public Relations Department leh National Infomatics Centre buatsaihna in vawiin khan Chief Minister Pu Lal Thanhawla chuan a hmasa ber atan Video Conferencing a nei. He video conferencing-ah hian hmel inhmu thei vek chungin Mizoram district khawpui zawng zawng, Lawngtlai tih loha MJA member ten Chief Minister hi bia in, hetiang hun Mizoram-in ala tawn ngailoh, remchang siamsak an ni chu Chief Minister chungah lawmthu an sawi An ngaihmawh leh vei zawngte Chief Minister chu zawtin, zawhna an neih zawng zawngte chu Chief Minister hian tha takin a chhang vek a ni. Video conferencing hi darkar khat leh a chanve vel hun hman a ni.
Saiha District DRA GB thukhawm	Top
August 13, 09 : Vawiin cawhma dar 11:00 khan D.R.D.A. Governing Board meeting chu Minister S.Hiato leh CEM, MADC S.Khipo hovin Saiha D.C.s Conference Room-ah neih a ni. He meeting-ah hian D.R.D.A. hmalakna hrang hrang review na leh hmalak chhunzawm zel dan tur sawiho a ni a, D.R.D.A. kaltlanga hmalakna scheme hrang hrang (1) NREGS (2) BRGF (3) IAY (4) IWDP (5) SGSY te chu a tlangpuiin tha thawkhat viau mahse, tun aia nasa zawka tan la a, ram leh khawtlang tan rotling (durable assets) siam leh thingtlang miretheite thleng phak tura ruahmanna siam thiam turin S.Hiato chuan official te chu a chah a ni. Minister chuan NREGS hnathawh dan chungchangah thingtlang kilkhawr zawka hna a that theihna turin tun aia nasa zawka a endikna hna (monitoring) uar nise, hna that lohna khuaah chuan a tul dan angin V.L.A., J.E. te leh V.C. te chungah action la ngam turin official te chu a chah a, IAY permanent wait list siam danah tun aia fimkhur zawkin mimal leh party induhsakna awm lovin scheme tum dan leh a guidelines in a tih angin a dawngtu tur dik tak (deserving families) te ngei thlang chhuak thin turin official te chu a chah bawk. DRDA kaltlanga Rural Haats sak dan tur chungchangah Tuipang, Kawlchaw leh Phura ah te sak nise, a sak dan tur chungchangah pawh Village Level Committee felfai tak dinin offical te nen tang tlanga district dangte entawn tlaka ruahmanna felfai tak siamin sa puitling ngei turin Minister hian official te hi a chah. Minister chuan Central sorkarin miretheite tana he scheme a ruahman hi a hmangtu mipui ten kan hmang sual palh a nih chuan nakin zel atan nghawng tha lo tak (moral corruption) siam thei tu tur a ni a, chuvang chuan Extra/Bogus Job Card awm lohna turin official te chu tun aia nasa zawka tan la a, fip taka he scheme hi kalpui turin a chah bawk a ni.
Swine Flu viltu tur CNO ruat	Top
August 13, 09 : Tunlaia natna hrileng hlauhawm tak ‘Swine Flu H1N1’ chu do hneh anih theihna turin Central Sorkar chuan chak taka hma la in, State leh UT tin te hma lak dan an thlithlaia, a viltu tur Central Nodal Officer a ruat thar vek a. Mizoram tana Central Nodal Officer turin Union Ministry of Culture a Joint Secretary Pu Nihal Chand Goel chu ruat a ni a. Ani hi vawiinah Aizawl lo thlengin Chief Minister leh mi pawimawh dangte a hmu nghal anga, H1N1 laka Mizoram sorkarin a inven dan tura hmalakna leh a inpuahchah dante a rawn zirchiang dawn a ni. Hemi chungchang hi Union Ministry of Health & Family Welfare chuan Chief Minister hi rawn hrilhhre tawhin, state sorkar hmalakna te thlirhova meeting nei turin thurawn an rawn pe tawh bawk a ni. Nihal Chand Goel hian vawiin khan Aizawl lo thlengin, Chief Minister Lal Thanhawla chu a chenna in, McDonald Hill-ah a hmu nghal a. District tinah damdawi awm ang angte pe vek tura rawnin, zirtirtute leh zirlai naupangte chu training pek nise a ti. Rinhlelh thisen sample thawnna tura Dibrugarh tih tawh chu Kolkata a nih zawk tur thu sawiin, Mizorama Doctor-te chu training nei turin Delhi atangin mithiamte an rawn kal thin ang a ti bawk. He inkawmna ah hian Secretary, AH & Vety, Jt Secretary, Health Services bakah a kaihhnawih department Director-te, Hospital & Medical Education, Health Services, AH & Vety, Higher & Technical Education leh School Education te an tel a ni.
Training Programme on UITTGM	Top
August 13, 09 : Sorkar hnathawk, PSU/Mizoram sorkar hnuaia Board hrang hrangte tan ni 5 chhung awh training ‘Utilization of IT Tools in Government Module - I’ chu 7 - 11 September, 2009 hian neih a ni dawn a. Heta tel tumte chuan application form siamsa hmangin NIC, Mizoram ah 31 August, 2009 tlai dar 4:00 hmain thehluh tur a ni. Application Form hi http://mizoram.nic.in/trg/nictrg09.htm ah download theih a ni a, NIC, Mizoram State Centre ah lak theih a ni bawk. Training tura thlanchhuah te hi NIC Notice Board ah leh website http://mizoram.nic.in ah September 1, 2009 hian tarchhuah a ni ang. He training ah hian Course Fee a awm dawn lova, TA/DA pek an ni lo bawk ang.
Pneumonia leh Typhoid chungchang hriattirna	Top
August 13, 09 : : Directorate of Health Services chuan Naupang Awmna (Pneumonia) leh Typhoid (Thihna thlentu natna hri) chungchangah mipuite hriat turin hetiang hian inzirtirna a chhuah : 1. Naupang Awmna (Pneumonia) : Borual a lo inthlak danglam leh ta ta a, he hun hi naupang kum 5 hnuailam awmna leh khawsikpui thlentu a ni. Thihpui awl tak a ni a. I fate heng natna laka an fihlim theihnan fimkhur rawh. Mahni thu in damdawi pek loh tur a ni a. Doctor rawn vat thin ang che. 2. Typhoid (Thihna thlentu natna hri): Typhoid natna laka i him theihnan - 1) Tui thianghlim chauh in thin ang che. 2) Ek leh bawlhhlawh reng reng thlahdah loh tur a ni. 3) Eitur khawih hma in kut sahbawn in fai taka sil thin tur a ni. 4) Tho bawm hnu leh thil thing reng reng ei loh tur a ni.
Biking Exhibition-ah Mizo 3	Top
August 12, 09 : Youth Hostel Association of India in Youth Hostel Association kum 100 tlin lawmna leh India ram bikah chuan kum 60 na lawmna denchhena Biking Expedition mi 100 telna tura Mizo tlangval pathum YHAI Mizoram leh Sports & Youth Services ten an thawn ve turte chu Home Minister Pu R. Lalzirliana chuan tukin dar 8:00 khan Khatla kawn atangin a vailiam. Tukin zinga Bike Expedition a tel tur tlangval 3, Saihmingliana Sailo, Jacob Lalrinawma, Ramhlun veng ve ve leh H. Lalroenga, Tanhril Venglai te hian Khardung La Pass atanga Leh, ft 11302 - ft 18379 khawvela motor kawng sang ber awm chu Cycle (Thirsakawr) hmangin mi 100 an tlan dawn a, km 600 vel tlan tura beisei leh an hun hman chhung chu ni 17 chhung (19.8.2009 - 4.9.2009) an hmang dawn a ni. Youth Hostel Association of India, Mizoram Branch hian man tlemte a India ram hmun hrang hranga thlenna neih theihnan te, pipute nun leh sulhnu, ramngaw leh nungcha humhalh inzirtirna te, ram hrang leh state hrang hrangte inkawm ngeihna siam te, hnam hrang leh ze hrangte inthliar lova nun dan zirte leh ram leh hnam tana tangkai dan zirte an buatsaih thin a ni.
AFO nih theih dan Awareness Campaing	Top
August 11, 09 : Department of Sainik Welfare & Resettlement buatsaih, Awareness Campaign on ‘How to join Indian Armed Forces & Central Police Organisation as Officers and below Officers rank ‘ tih thupui hmanga vawiina Vanapa Halla neih chu Chief Minister Lal Thanhawla'n a hmanpui. Chief Minister chuan rambuai hmain India hmarchhak hnam hrang hrangte zingah Mizo te chu sipaia tang tam ber thin kan ni tiin, buai hnu atang chuan kan tlem tial tial a ni, a ti a. Kum 1984 atang khan tan kan la viau nachungin hma sawn tam erawh a harsa a ni, a ti. Kan thenawm state, Sainik school hun reitak lo nei tawhte chuan helamah hian min tlan pel nasa tawh a, han umpha leh tur pawhin tunah hian DONER Ministry remtihna in Chhingchhipah Sainik School kan din ve thei dawn chauh a. Thalaite talent cho chhuah tham awm hi kan la cho chhuak thiam lova, midangte aiin kan te bik lova, kan hniam bik heklo a ni tih hi kan hriat tlan erawh ka duh a ni, a ti. Col (Rtd) John Zama,SM, Director, Sainik Welfare & Resettlement chuan hetiang hun hman hi Mizoramah a hmasa ber a nih thu sawiin, Chief Minister duhdan anga Mizo thalai ten Armed Forces chi hrang hrang chiang zawka an hmelhriat theih nana he hun hi buatsaih anih thu leh, hmarchhak state-a Sainik School dinhmun tarlangin, Goalpara, Assam-ah Kum 45 a upa awmin, Imphal-ah kum 38 a upa leh Nagaland-ah kum 3 a upa te an ni a, Mizoramah chuan Chief Minister hmalakna azarah Chhingchhip-ah kan nei leh dawn a ni, a ti. Awareness campaignah hian Indian Army, Navy leh Air Force chungchang power point hmangin Col RA Venkatarahman, Commodore NP Brahma leh Wg Cdr IVR Roa ten an hrilhfiah a; Siapi Officers bang tawh ten an experience te sawina hun hmangin, Sipai Officer Mizo Nula Capt.Zonunsangi pawhin thusawina hun a hmang bawk.
RD Minister hovin BDO thukhawm	Top
August 11, 09 : Sorkar laipui ruahmanna hnuaia ramri dep khuate tih hmasawnna tur Border Area Development Programme (BADP) leh district hnufual dawm kanna tur Backward Regions Grant Fund (BRGF) kengkawhtu D.C. leh BDO te chu vawiin chhun khan R.D. Minister Pu R. Lalzirliana hovin ama office-ah an \hukhawm a, an hmalakna leh hmabak an neih te thlir hovin harsatna hrang hrang an neihte pawh sawi ho a ni. Minister chuan BADP leh BRGF thil tum sawi nawnin thingtlang mirethei leh hnufual deuh deuhte chawikanna tur anih dawn avangin heng atana sum te chu dik tak leh a daihzai thei ang bera hmang turin BDO te chu a hrilh a. Sawiselna leh inpuhmawhna hrang hrang awm thei lakah ding nghet tlat tur leh dik taka hna an thawh chuan sorkar chu an lamah a tang tlat ang, a ti. Sorkar hmalakna reng reng hlawhtlinna chu politician te chungah ni lovin, sorkar hnathawkte rinawmnaah a innghat zawk tih a sawi a, an hmalakna \heuhah a hmun ngei a kal a hnathawh dan vil ngun turin a chah bawk.
SIT Operators Training-ah H&TE Minister	Top
August 11, 09 : Vawiin khan nihnih awh tur Satellite Interactive Terminal (SIT) Operators Training SCERT Auditorium, Chaltlang-a tan chu Pu Lalsawta, Minister of Education,etc-in a hmanpui. He SIT Operators training hawnna inkhawm hi Malsawmthangi, Director, SCERT-in kaihruaiin, he zirtirna petu zinga hotu ber, Shri A.K.Tyagi, Scientist & Engineer-in training an pek chhan leh thingtlang lam mite hnena tunlai inbiak pawhna kaltlanga zirtirna tha an dawn theihna tura tan lak a nih dan a sawi bawk. He Satellite hmanga inzirtirna tur hi a tam thei ang berin an chhawr tangkai theih nan tuna zirtirtu lo kal, rawn training te hi an pawimawh em em dawn a; khaw lian deuhva High School-a zirtirna pawh school dang te pawhin an chhawr tangkai theih ngei tura beisei a ni bawk. Mizoramah hian EDUSAT (Educational Satellite) hi satellite hmanga zirtirna tihna a ni a, zirlai thenkhatten harsatna an neih topic thenkhat, zirtirtuten an sawifiah thiam chiah loh deuhte tanpuina tura buatsaih a ni a; Mizorama kan zirtirtuten tihtakzeta an hna an thawhna kawnga puitu tha tak tur, khawvel ram changkangte tihdan pawh hriat zel theihna tur, thil tangkai tak a ni dawn a ni. Tunah hian Mizoram pumah DIET 2, District Resource Center (DRC) 6, Block Resource Centres 22 leh High/ Higher S. School 19-ah hetiang thawn chhuah theihna SIT hi bun fel tawh a ni.
District Level Renewable Energy thukhawm	Top
August 10, 09 : Vawiin chawhnu khan District Advisory Committee on Renewable Energy Day 2009 chu an Chairman Pu C. Thanchhuma, Aizawl District Bawrhsap hovin an thukhawm. He meeting-ah hian August ni 20 a Rajiv Gandhi Akshay Urja Diwas hman dan tur chipchiar takin sawiho a ni. He ni pawimawh tak power energy renchem a tul zia leh pawimawh zia mipuite hrilhhriatna ni hman turah hian media te kaltlanga awareness uar taka hman nise tih te rel a ni. A hmanna hmunpui August ni 20 Dar 11:00 AM hian Co-operative Hall, Babutlang-ah hun hman a ni ang a, mithiam sawm bik leh school naupang thlanchhuah bikten hun an hmang ang. He hun hmanna ah hian item chi hrang hrang - power energy renchemna lam kawk, Extempore speech leh short drama-ah te inelna siam a ni ang a. Aizawl khawpui lun laiah te banner chi hrang hrang tar a ni ang a, power renchemna inzirtirna lam thute tarchhuah a ni bawk ang. He inkhawm pawimawh tak hman tur hi Aizawl Bawrhsap C. Thanchhuma’n a kaihruai anga MUP lam atangin vote of thanks ngaihthlak a ni bawk ang.
Swine Flu laka inven dan tur ngaihtuah	Top
August 10, 09 : Chief Secretay Vanhela Pachuau hovin vawiin khan a Office Chamber-ah tunlai khawvel pum tuam mektu hrileng Swine Flu (H1N1) laka Mizoram mipui kan him theih nan engtiang a chet lak tur nge ni ang tiin Health Department, AH & Vety Department, Police, I&PR, CYMA, MJA hotute nen an ngaihtuah. He inkhawm ah hian Dr Lalmalsawma Pachuau in Swine Flu rawn in tan dan leh khawvel ram hrang hrang a tuam mek dante, a natna lanchhuah dan leh a enkawl dan chung chang te Vedio Screen a ti langin a sawifiah nghal a. Hemi hnu hian Chief Secretary in kan kawtchhuah mai Kolkata leh thenawm Manipur ah te a vei an hmuhchhuah tawh avang a rang taka a in ven hna kan thawh a tul thu sawiin hmalak dan tur hrang hrang ruahmanna siam nghal a ni. Health Department leh Police te tang dunin Lengpui Airport a khual zin lo haw a piangte hriselna enfiah nise; an dinhmunte chhinchhiah fel zel nise an ti a. Tun dinhmuna kawtchhuah pawimawh bik Ngopa leh hmun dangah pawh hetiang tho hian enfiah ni bawk se an ti. Mipui inzirtirna lam a tam thei ang berin Health Department, AH & Vety Department leh I&PR ten lo ruahman se an ti bawk. Mi tupawh khawsik sang, thawk harsa, hrawk thip, khuh, hnarping, taksa na themthum,ruhchuktuah na etc.. chuan Damdawiin ah doctor te in entir vat tur a ngen an ni.
Ch. Saprawnga Truck Terminal Parking Fee	Top
August 7, 09 : Aizawl Municipal Council thupek angin Ch. Saprawnga Truck Terminal, Rangvamual a motor park-na rate thar hman tur a ni a. Darkar 24 chhung Traillers/Earthmovers park-na manah Rs. 150/- a ni ang a, Motor lian truck leh bus te park-na manah Rs. 100/- lak a ni ang. Motor te light vehicle leh two wheeler tan phalna tel lova luh phal a ni lo. He thu pek hi thu leh awm hma chu tun atanga hman nghal tur a ni.
RNTCP Review Meeting nei	Top
August, 7, 09 : Vawiin hian Tourist lodge, Conference Hall, Berawtlang ah Revised National TB Control Programme(RNTCP) hmalakna thlirletna neih ani a, he hun hi Dr.Laldawngliana Sailo, District TB Officer in a kaihruai a, Dr.N.Pallai, Director of Health Services chuan khuallian niin a hmanpui. Health Director chuan thusawiin kumtin Private Agency atanga Mizorama Health Programme hrang hrang te rawn endik thin ani a, an report a a landan ah chuan TB programme hnathawh hi Health Department hnuaia programme hrang hrang zing ah chuan a hlawhtling pawl ani ati a, hetianga hlawhtlinna tha a awm theih chhan chu hnathawktute thawh ho thatna avang liau liau anih thu leh entawn tlak atih thu a sawi a. A pawimawh ber ah chuan mipuite nen a thawhhona leh inpawh tawnna kan neih a pawimawh hle a ni, a ti. Meeting kaihruaitu Dr.Laldawngliana Sailo, Dist.TB Officer Aizawl chuan District hrang hrang te hmalakdan report khaikhawm in report a pe a, April - June, 2009 chhung hian Mizoramah TB vei hmuhchhuah thar mi 713 zet kan awm a, heng zinga mi 151 te chu an khak ah TB hrik hmuh ani a. Heng TB vei mek te hi uluk taka enkawlna pek thin an ni. Mizoram State AIDS Control Society atangin Project Director, Dr Eric Zomawia leh Lallianzuala, Consultant, UNICEF te pawh lo telin Mizorama TB/HIV report kimchang leh hma anlo lak tawhdan te report an pe a, India ram pumah mipui 40% chu TB vei anga chhut ania, mi 2.5 millions te chu HIV+ve an ni a. Heng TB vei zing a 1%-13% hian HIV positive vei ngei tura rin ani an ti bawk. MSACS leh Mizoram State TB Control Society te tangkawp chuan TB/HIV natna laka mipuite kan lo him zawk theihna turin nasa takin hma an la mek a, TB/HIV Co-ordination Committee hial din aniin State ah chuan Chief Secretary in a ho a, District tin ah chuan DC in a ho a, he committee hi thla 3 dan ah neih thin ani bawk.Meeting ah hian District tin atangin District TB Officers te bakah thawktu hrang hrang mi engemawzat an tel a, WHO atangin RNTCP Consultant Dr.Palash Talukdar pawn he hun hi a rawn hmanpui bawk a ni.
CM-in Passing Out Parade hmanpui	Top
August 7, 09 : Chief Minister Pu Lal Thanhawla chuan ‘ Force nih chuan fit angai a, discipline a pawimawh ber fo a ni’ a ti. He thu hi vawiina Police Training Centre, Lungverha 61st Batch Recruit Constable Passing Out Parade neihna a sawi a ni. Chief Minister chuan police constable passed thar te chu force an nih avanga mahni inthununna ngai pawimawh tura chahin, hun vawng dika, englai pawha fit turin a chah a. Ram ven hna thawk tur an nih avangin huaisen leh fit an nih angai a, chumi tur chuan hrisel a ngaia, hrisel tur chuan zuk leh hmuam leh ruihtheih thila fihlimin, kan ei leh in thlenga kan duhtui angai a ni a ti. Pu Hawla chuan tunlaiah Mizo ten discipline kan tlakchham thu sawiin, mahni hotute ngei pawh hmuh duhloh avanga hmuh loh derte, uniform ha chunga thut zun zunte a inhmeh lova, a chhe laite chu siam that hna thawh chhoh zel a ni ang a ti a.. An chhechhamna a an intiam ang ngeia hawihhawm taka awm chu tih makmawha nei tura chahin, aia upate leh senior zawkte chu chawimawi thiam thin turin a fuih a ni. Chief Minister chuan police te chu mipui thlamuantu tur leh chhantu tur an nih avangin, rinawmna te, taimaknate, diknate, thianghlimna te leh hawihhawmna te nen hna thawk thin tura chahin, darkar 24 hna an thawh avanga kum khatah thla 13 hlawh pek an nih chhante hre ranga, phur taka an hna chu thawk turin a chah a ni. Chief Minister chuan 4th IR Bn a mi tur an nih thu sawiin, an chungah Mizoram sorkarin thu tawp a neilo a ni a ti bawk. Lal Thanhawla hian Police Martyrs Memorialah pangpar a dah a, PTC Souvenir hmasa ber chu a tlangzarh bawk a. Recruit Constable ten training an neih chhunga inelna chi hrang hrang neiha titha te hnenah lawmman a sem bawk a ni. Vawiina pass chhuak ta te hi 4th IR Bn tura lakte an ni a. A tira training tura lutte hi 511 an nih lain, passing out parade a telte hi an vaiin 472 an ni. Adang 27 te chu hren khawtlai an ni a, 7 dangte chu training chhunzawm theilo leh 3 dangte chu ban an ni. Basic training chhung zawng hi hapta 45 chhung a ni a, syllabus Indoor leh Outdoor subject ah te zirtirna pek an ni.
Health Care Bill tang pe thei dawn	Top
August 7, 09 : Health Minister Lalrinliana Sailo hmalakna avangin Health Care hnuaia bill tangte chu Relian Company chuan pek a remti a. Bill tang te chuan heng document (Xerox) te hi mahni awmna damdawi in theuhvah ni 15.8.09 hma in theh luh tur a ni : 1. Chhungkaw hotu ver voter ID emaw, damlo voter ID (kum tlinglo a nih chuan a nu/pa voter ID) 2. Chhungkaw Ration Card 3. Enrolment Form Refera phaia kalte chu Health Care office, Dinthar ah a chunga tarlan document te khi kengin in report tur a ni.Damdawi in ten document an dawn hnuah Health Care Society Office ah ni 21.8.09 hma in an thehlut tur a ni bawk. Hemi hun chhunga thehlut lo chu bill pass a nih loh pawhin sawi buai theih a ni tawh lovang. Zawtfiah duh tan heng phone number ah te hian zawh fiah theih a ni : 0389-2310842/0389-2310844
CS hovin BRGF chungchang thlirho	Top
August 7, 09 : Kum 2007-2008 chhunga Saiha leh Lawngtlai district ten Backward Region Grant Fund (BRGF) an dawn tur zinga 90% an hmuh tawh hman chhuah dan leh kum 2008-2009 atana Annual Action Plan an buatsaih thlir hovin vawiin khan High Powered Committee on BRGF chu Chairman Vanhela Pachuau, Chief Secretary hovin Secretariat conference hall ah an thukhawm a. BRGF atan hian Ministry of Panchayati Raj atangin Saiha district chuan kum 2007-2008 chhung atan sum cheng vaibelchhe 9.03 hmu tawhin Lawngtlai chuan vaibelchhe 9.94 an hmu tawh a. Hei hi an sum hmuh tur zawng zawng za zela 90% niin a bak 10% dawng turin thil pawimawh te tihfel mek a ni. BRGF sum hi Saiha leh Lawngtlai district te chuan Retaining wall, steps, tuihawk luankawr, truck kawng, community hall, khelmual leh hmasawnna hna hrang hrang thawh nan bakah mirethei in sak sak nan an hmang a. BRGF sum hmanna hi mumal leh fel taka kalpui a nih theih nan High Powerd Committee chuan hmalakna tur chi hrang hrangah sum bithliah fel tak neih hran theuh ni se, a ti a, sorkar department dangte nen hmalak inthuah a awm loh na turin a kaihhnawih department te nen inrawn thin ni se, a ti bawk a. Mirethei in sakna tur sum rualkhai taka sem tlan a nih theih nan Saiha leh Lawngtlai te chu rate inangin BPL chhungkaw pakhat tan cheng sing nga an bituk bawk a ni. BRGF sum enkawl hna hi Planning department atangin Rural Development department kutah nikum atanga dah a ni a. Vawiina High Powered Committee thukhawm chuan kum 2008-2009 atana Lawngtlai leh Saiha district ten Annual Action Plan an siam chu sorkar laipuia thlen a nih hma in thil thenkhat siam that ngai la awmin a hria a. BRGF sum awmze nei leh tangkai taka hman a nih theih nan uluk taka enpui turin Committee chu tun aia zinga thukhawm thin turin an rel bawk a ni.
Bharat Scouts & Guides Workshop	Top
August 6, 09 : Mizoram Bharat Scouts & Guides buatsaihin ‘Workshop on State Strategic Plan- Vision 2013’ chu State Training Centre Tanhril-ah neih mek a ni a, R.K.Kaushik, Regional Director chuan he workshop hmanpuiin, workshop hian August ni 8, 2009 thleng a awh ang.
Bus Owners' nawrhna chungchanga sorkar thuchhuah	Top
August, 6, 09 : Aizawl City Bus Owners’ Association ten fare chungchanga lungawi lohna entirnan mipuite chungah harsatna an siam hi Mizoram sawrkar chuan pawi a ti tak zet a. Bus chuan man siamthat hi bus neitu leh mipui te tan pawh na lo ve ve tura siam a ni a. Harsatna lo thleng mek ah hian mipui tawiawmna Mizoram sawrkar chuan a ngen a, hmalak chhunzawm zel a ni. Tun maiah hian Mizoram sawrkar chuan taxi leh maxi cab chuan man te ennawn a tum rih lo. Tun dinhmun atan mipui awlsam nan Transport Deptt. chuan MST bus Zemabawk Field bul atanga Kulikawn inkarah leh Temple leh Ramrikawn inkarah a theih ang ang tlan tir a tum a. Department dang staff bus pawh hman an ni ang. Mizoram Sorkar chuan Mizoram Road Transport Union ten Silchar lam mi te phungbawm sawma mipui harsatna siam an tum hi pawi a ti takzet a ni. Hetih lai hian State Transport Authority chuan Thawhtanni, August ni 10 hmaa an thu intiam ang ngeia bus te an tlan tir loh chuan an chungah action a tul anga lak a ni ang tiin an hriattir a ni.
Video Conferencing	Top
August, 6, 09 : Vawiin chawhnu dar 1:00 khan darkar khat chhung NIC leh I & PR Department te buatsaih District hrang hrang Mizoram Journalist Association leh Information Department hotute Video Conferencing a ni. He hunah hian mahni awmna District theuh atangin TV ah inhmu tawnin an in be hlawm a, Mizoram hmun hrang hranga thil thleng pawimawhte an inhriattir tawn a ni. L.R. Sailo, Director, I & PR hovin, I & PR Officer te NIC Office puiah awmin, Aizawl Journalist te, I & PR Officer te nen DC Complex NIC Conference Room-ah, District dangte an awmna hmun theuh NIC Office ah an awm a, Mamit chu line a that loh avangin an lang lova, Serchhip lamah line a awm tawh thu hriat tlai a nih avangin an tel lova, Lawngtlai District pawh line la fel loh avangin an tel lo. Aizawl, Kolasib, Champhai, Saiha leh Lunglei te erawh chuan inkawmna hun tha tak an hmang a ni. Khawvel changkang chho zelah Mizoram pawhin hmasawnna nasa tak nei chhovin mahni awmna hmun atangin District dang daihte hmel hmu theiin an inkawm thei ta a ni.
Home Minister-in 4th IR Bn. Passing Out Parade hmanpui	Top
August, 4, 09 : 61st Batch recruit constables (4th IR Battalion) te chuan an training zovin vawiin khan Police Training Centre (P.T.C.), Thenzawl-ah Passing Out Parade an nei a. Home Minister Lalzirliana'n Parade Inspection a neih hnuah 4th IR Bn. constables ten rinawmna thutiam an la. 'March past salute' a chhan hnuin Home Minister chuan thu a sawi a, constable 468 training zova passing out parade hmangte chu chibai bukin, duhsakna sang ber a hlan a ni. 61st Batch Recruit Constables (under 4th IR Bn.) te hi nikum 20 August 2008 atang khan P.T.C. Thenzawl-ah training an nei tan a. An training chhung hian an duty-naa tangkai tur Subject hrang hrang zirtir an ni a. Damlohna leh harsatna avangin an zinga mi 10 te chuan training an zo thei lova, mi 27 te chu training la pek belh ngai an awm bawk a, hengte tel lovin vawiina Passing Out Parade hmang thei ta te chu an vaiin mi 468 an ni. 4th IR Bn. Staff dinhmun chu hetiang hi a ni : Commandant-1, Dy. Commandant-1, Asst. Commandant-NIL, Inspector-7, Sub-Inspector-20, ASI(M)-5, Havilder-49, Naik-43, Constable-92, Driver-18, Staff Nurse-2, lab Technician-1 leh IV Grade-55. Home Minister chuan IR Battalion-te dinhmun sawiin, state police mai ni lo, India sorkar laipui nena kan intawm, Home Ministry-in a mamawh hun huna a koh chhuah theih an ni, a ti a. Indona hmunah emaw duty tura koh chhuah an nihna hmunah Mizo tlawmngaihna leh Kristian kan nihna, thian chhan thih ngam hnam huaisen kan nihna te lantir zel turin a chah. Home Minister chuan police transfer dilna a hnena thehluh a nih fo thin chuan hnathawh a tihharsat thu leh reiloteah hetiang dilna te phal a ni tawh lovang, a ti bawk. Home Minister hi Minister of State N.K. Chakma, Parliamentary Secretaries leh MLA te, Mizoram DGP Lalrokhuma Pachuau, Police leh Sorkar officials engemawzatin he hun hi an hmanpui a ni.
Investment Programme Empowered Committee din thar	Top
August, 4, 09 : Mizoram sorkar chuan Asian Development Bank (ADB) ina a tum tur North Eastern Region Capital Cities Development Investment Project (NERCCDIP) (Phase0I) hnuaia ‘Investment Programme Empowered Committee (IPEC)’ chu din thar lehin a hnuaia mi ang hian mawhphurhna hrang hrangte chu hlan an ni: 1. Commissioner/Secy., UD&PA Deptt. - Chairman 2. Secretary, Finance Deptt. - Member 3. Secretary, PHE Deptt. - Member 4. Secretary, LR&S Deptt. - Member 5. Addl.Secretary, UD & PA Deptt. - Member 6. Principal Adviser, State Planning Board - Member 7. E-in-C, PHE Deptt. - Member 8. Chief Engineer (Building), PWD - Member 9. Director, UD&PA Deptt. - Member 10. Director, LR & S Deptt. - Member 11. Engineer Member, ADA - Member 12. Chief Executive Member, AMC - Member 13. Addl. Secretary, Finance Deptt. (EA) - Member 14. Dy.Secretary, Finance Deptt. (EA) - Member 15. Under Secretary, Finance Deptt. (EA) - Member 16. Jt. Director, UD & PA Deptt. - Member 17. Project Director, SIPMIU - Member Secy.
State Steering Committee for implementation of ACUDP	Top
August, 4, 09 : Mizoram sawrkar chuan Asian Development Bank (ADB) ina a tum tur North Eastern Region Capital Cities Development Investment Project (NERCCDIP) (Phase-I) hnuaia State Steering Committee for implementation of ‘Aizawl City Urban Development Project’ chu din thar lehin a hnuaia mi ang hian mawhphurhna hrang hrangte chu hlan an ni: 1. Chief Secretary, Govt. of Mizoram - Chairman 2. Commissioner/Secretary, UD&PA Deptt. - Convener 3. Principal Secretary, Finance Deprtt. - Member 4. Commissioner/Secretary, Planning Deptt. - Member 5. Commissioner/Secretary, PHE Deptt. - Member 6. Secretary, PWD - Member 7. E-in-C, PWD - Member 8. E-in-C, PHE - Member 9. Principal Adviser, State Planning Board - Member 10. Director, UD & PA Deptt. - Member
Mizoram Annual Plan 2009-2010 atan Rs.1250 crores	Top
August, 3, 09 : Kum 2009 – 2010 atan Mizoram Annual Plan chu Cheng Vaibelchhe 1250 ni turin Chief Minister Lal Thanhawla leh Planning Commission Dy Chairman Montek Singh Ahluwalia ten New Delhi-ah Aug. ni 3, 2009 khan an tifel. Hei hi kum 2008 – 2009 Plan Fund ai khan 25 % in a tam a, kum 2004 – 2005 hnu lama Mizoram State Annual Plan Outlay tam ber tum a ni. Chief Minister Lal Thanhawla chuan Mizoram sorkar-in New Land Use Policy chu hna pui bera a kalpui thu Dy. Chairman hi hrilhin, hnathawh tur chi hrang hrang tam tak siam a nih thu a sawi a. Hnathawh viltu tur leh endiktu tur pawh state, district leh thingtlang khuate level-ah din a nih tur thu sawiin, tlawmngai pawl leh khawtlanga mi inhmangte nasa taka inhnamhnawih tir a ni ang, a ti. State sorkar chuan he policy hi hlawhtling taka a kalpui theih nan central sorkar tanpuina kum 5 chhung atan cheng vaibelchhe 2,500 a beisei bawk dawn a ni, a ti. Montek Singh Ahluwalia chuan Mizoram sorkarin agriculture leh horticulture-ah nasa zawkin tan la se a duh tih a sawi a, tlangram lo neih bansan theih dan ngaih pawimawh nise, a ti bawk. Sum leh pai dehchhuahna lamah public private partnership (PPP) uar zawka kalpui tur leh, a bik takin lakhuihthei sawngbawlna leh a hralhna lamah PPP phurpui turin a chah bawk. Dy Chairman chuan Chief Minister hnenah hian Mizoram mamawhte chu a bik taka enchhoh a nih tur thu hrilhin, a tul a nih chuan 'plan mid term appraisal' ah central tanpuina pawh pek belh tura ngaihtuah a nih tur thu a sawi a ni.
State Food Health Authority thuchhuak	Top
August, 3, 09 : State Food Health Authority chuan rampawn atanga eitur lakluh chungchangah hetiang hian hriattirna a chhuah : Sawkar laipui chuan mipuite kan him tlan theih nan China siam eitur abik takin chocolate India ram chhunga lak luh leh zawrh a khap a. State tin te pawh he mi chungchang a hma la tura ngen kan nih angin kan ram chhunga ei leh in lam chi, a bik takin China leh khawchhak lam siam reng reng lakah mipuite kan fimkhur a ngai hle a ni. Chocolate leh bawnghnute telna lam chi reng reng, chocolate bar, sweet (candy), wafers, cereal drinks (calsome etc.), jelly, magic pops leh tunhnai maia kan ram chhunga zawrh thar bawnghnute powder sarang tereuh te a infun, fiante chhawm TOMO an tih ang chi te lakah hian fimkhur tlang theuh turin kan in ngen a. Sumdawngte pawh heng thil kan tarlan takte hi ngai pawimawha zuar lo tur hriattir an ni.
Trade & Commerce Minister-in Export seminar hmanpui	Top
August, 3, 09 : Mizoram Entrepreneurship Network (MEN) chuan Export-Import Bank of India (EXIM Bank) leh Export Credit Guarantee Corporation (ECGC) te nen tanghovin I&PR Conference Hall-ah ‘Seminar on Export Potential of Mizoram’ an buatsaih a. Trade & Commerce Minister Lalrinliana Sailo chuan Seminar hi hmanpuiin EXIM Bank lehkhabu buatsaih ‘Mizoram : Export potential & Prospects’ tih chu a tlangzarh. Seminar-ah hian Trade & Commerce Minister bakah Mizoram pawn atanga lo kal mi pawimawh tak tak T.C. Venkat Subramaniam, Chairman & Managing Director, EXIM Bank; Prof. Ashoke K. Dutta, Director, IIM, Shillong leh S. Srinivas, Director, EXIM Bank ten thu an sawi a. Chawhnu lamah thupui thlan chhuah hrang hrang hmangin David Sinate, General Manager, Exim Bank leh mithiam dangte thuziak leh an hmuhdan te zirho a ni. EXIM Bank hi thil thawnchhuah leh lakluh (Export & Import) kaihhnawiha financial institution hrang hrang khaikhawmtu ber a ni a. Hetiang lama project siam thinte tangkafai leh thil dang chi hrang hrangin a pui thin a ni. Thilsiamna tenau leh thang mek te pawh nasa takin a chhawmdawl thin. Hmarchhak state te tan bik
Business Summit-ah Mizoram Governor	Top
August 1, 2009 : Indian Chamber of Commerce ten Business Summit, Kolkata-ah an buatsaih a. He hunah hian Mizoram Larsap Lt.Gen (Rtd.) M.M.Lakhera, PVSM, AVSM, VSM pawh tel vein, Larsap chuan Mizoram chu sumdawnna thila hmala duhte tan a inhawng reng a ni, a ti. Mau leh thing lamah te leh kawlphetha siamchhuahna 3000MW thlengah te hmalak theih a nih thu a sawi. Thil siam lama tuimi tam takte zawhna chhangin Larsap chuan, Mizote chu \hian ngaina tak, nelawm tak an ni a ti. Dan leh thupek chungchangah pawh anmahni ngei Mizoram tlawha, a muanawm zia hmu mai turin a chhang. Governor hian Shri Aurobindo Political Life, Alipore Bomb Trial, Shri Aurobindo a Uttarpara Speech leh A Centenial Perspective Workshop chu hemi ni vek hian a hawng bawk.
Go to September News